In de serie “Sjlechter Jos verhaalt” vandaag het eerste stuk waarin Jos de lezer meeneemt langs de agrarische bedrijven in het Belfeld van weleer.

Het is al ein paar jeurkes geleeje . Belvend waas ein echte platte landsgemeinte wao diverse boeren met gemingde bedrieve, akkerbouw, viej en greunte, heur botterham verdeende. As se vanoët Tegele langs de “twelf apostele” Belvend binne kwaams, kreeg se auch al direk te make met dees bedrieve. Jeu  Op het Veld met tomaten en diverse greunte. Sjengske Dings had viej en akkerbouw. Jeu Heggers tuinder, Gebr. Geurts “karelsboer” kiepe, greunte en anger viej. Taxs, gemingd bedrief. kwaam oët Mierlo. Dae waas penningmeister beej de harmonie en sjreef alles op in zien “buukske”. Jaer van Pietje, wao now cafe geloë is, had auch ein gemingd bedrief. Dao achterum had Toën van Pietje (broor van) landbouwmachines sjtaon die hae gebroekde veur zien loënwerkersbedrief . Toën haet auch nog café “De zadelkamer” gehad. Det loog taegeneuver Café geloë, en is later nao baolder verhoesd wao hae ein manege is begôs. Linksaaaf ging se de venwaeg op. Rechts loog dao Frens van Pietje. De ruine van det bedrief haet dao nog hiel lang gelaege.  Get verder door waar “de boën” met veural kiepe en fruit. Ging se rechtsaaf de kapelwaeg op, den kwaam se langs Colbers, auch ein gemingd bedrief. Hiel vuul jônges daovan sien dao nao doorgegaon in de agrarische sector. Veural greunte, bloome en fruit. En nog veur de euverwaeg, wao now det houte hoes lik, woende Lei Vervoort. Dae had auch vuul van det klein fruit en tomaten, staekbaere, framboëze, en aerbaeze. Gings se de euverwaeg euver en den rechtsaaf enne zankwaeg op, den kwaam ss langs de appeleboer Thurlings, en ônger in het gaat Antoën van de Pas. (Smits) Dae huurde al beej de grottere bedrieve. Eine kleinzoon dao van waas eigenaar van de Smitty Farm en exploiteerde ein groëte geitenfarm. Rechdoor um hoëg kump se oët op de riekswaeg. Linksaaf en men kump den wir oët beej de aafsjlaag kapelwaeg. Rechts loog het bedrief van Jan Dings. De zonen van Jan runne now nog same dit gemingd bedrief . Veural akkerbouw en verkes. Taege-euver Dings woënde Piet van Cleef auch met ein gemingd akkerbouwbedrief. Reej se de kapelwaeg aaf den kwaam se wir oët op de tegelse waeg met op de hook de boerderie van Pietje. Dees boerderie is veurzichtig aafbebraoke um ze later wir op niej eurges op te bouwe. Maar dit is helaas neet toet oëtveuring gekomme. Rechs aaf op de Tegelse waeg kwaam se langs Jeu Boënen. Dae deej veural in eieren en kiepe (het ein geit now einmaol neet zônger het anger) en had daobeej auch nog anger viej. Dwars aan de waeg loog doa auch nog ein boerderieke van de, ich mein Geb. Simons, Vôlges ingeweide hong de veurgevel allein nog vas aan de straumkabel baove de waeg. Wie ze dae weg haolde veel de ganse knômmel in. Ich mein det ein van die breurs het laeve neet mier zoog zitte en enne angere waeg gekaoze haet. Dao taege-euver woende Sjaar v.d. Munckhof. Dae teelde auch klein fruit en tomaten. Gubbels met verkaup aan hoes is dao vôlges mich ein stök later begôs. Richting dörp kwaan se beej ’t kruuts. Rechts van ’t kruuts (now de Belfeldse Garage) had Wieke van Geraets grônk.

Det waas eine vreejgezel dae in het bos woënde asse beej “de horst” umhoëg gings richting Tuunke janssen. Eine leuke en hendige vent. Dae makde zien machines zelf en had auch eine zelfgemakde fraes dae oërsterk waas. Vôlges mich waas Wieke de ierste in Belvend dae sperges verbouwde. Links beej het kruuts ging se de Gaesstraot op. Achteraan links Sraar van Dings. Dae waas veural good thoes in viej, zoëwaal verkes as rinkviej. Vanoët het kruuts rech door de sjoëlstraot op  kwaam se langs “de Möp”  van Cleef. Dao hebbe later nog Wim en Mien Colbers gewoend en verkochte greunte en fruit aan hoës. Op de hook van de sjoëlstraot/zankstraot woende Melis,  enne gerdeneer dae later nao de Malbeckerwaeg is verhoësd. Gans achter aan op de verlengde zankstraot woënde Graedtje Geraeds, auch eine gerdeneer. Rechtsaaf beej Graedtje geis se de Leygraaf op en kwaam men oët in de boch van de Malbeckerwaeg. Richting de Prins Hendrikstraot kwaam se auch langs diverse bedriefkes die eur botterham verdeende met het verbouwe van greunte, fruit en het haaije van klein viej, veural kiepe. Ingele, Lankes, Jansen(hekseleboer),Hoeymakers, Kórsjes, Sieben. Ging se richting Malbeck den kwaam se langs Pietje van Killaars,  auch eine vreejgezel en gerdeneer. 

De volgende kier nog mier historie van Belvendse agrarische bedrieve…