Sjlechter Jos Hoezen verhaalt in de rubriek “Wie ich nog ein jungske waor” over herinneringen uit zijn jeugd in Belfeld.

Veel leesplezier!

Ierste vreejer

Ich zal ein jaor of tien gewaes sien wie de ierste vreejer beej ôs euver de dörpel kwaam veur mien zuske. En ich ken mich genne angere veurstelle, dus ich dink det ’t dao now nog met vreejt. Kwaam se veur de ierste kier, waas ’t zaak desse in elk geval in ein good blaedjje kwaams te staon beej dien sjoënmooder. Want die heel alles in de gaate.

Dow kos elkaar neet wie now elke daag of aovend zeen. Nae, woensdigaovend, zaoterdigaovend, en met wat gelök zondaagmiddaag met ’n stökske van de aovend want mondaag mos wir gewerkt waere. Maar dae vreejer waas sjlum!! Holp die angere van ôs met hoeswerk, deej met bezorge en verrichde allelei karweikes in hoes, want hae waas auch nog hendig.

Zoë haolde hae zich ’n wit vutje beej ôs mam en beej de res kôs hae auch gen kwaod doon. Langzaam maar zeker ging hae dael oët make van ôs gezin en huurde d’r op den duur gewoën beej.

Wat neet in heel desse dich as vreejer alles kôs permitere. Dow zoogs dien maedje waal dökker, maar dao mosde het ’t den auch maar met doon. Gen gefleddder, want den sting die van ôs al op de achterste “puut”. Oké, doo muugs komme, maar den netjes op de bank zitte, of ’t maedje met helpe, of urges angers dien heng oët de mouwe steake. As hae den nao hoes ging meugde zien maedje effe mei nao boëte.

Eine kier zoot zoor ich op de w.c. Die waas beej ôs boëte langs de achterdeur. Baove-in zoot ’n raemke wat altied aope sting. De vreejer nom aafsjied met links en recht ’n kösmoel. Ich huur mien zuster zegge, “Hoije en slaop lekker jong en baej auch veur mich ’n weesgegroetje”. Jao, dao mosde men het maar met doon. Ich dink neet det d’r now nog eine vreejer zoë aafsjied nimpt. Maar ja, hae en weej wiste neet baeter. Hoewaal!?

Weej dörfde neet.