Nieuws

Sjakie en Einstein

8 maart 2023

Sjlechter Jos Hoezen verhaalt in de rubriek “Wie ich nog ein jungske waor” over zijn herinneringen aan de lagere schooltijd in Belfeld.

Veel leesplezier!

WieIchNogEinJungskeWaor Emmer 20230308

Ut waas ôngertösse al ein oor, en um half twië begos de sjoel wir. De jas wir aan en truuk nao sjoel. De gemeinte waas met de drekswage rônk aan ’t gaon. Bert van Naus aan ’t sjteur en Wim Rievers, Miechels en Frits Geraads leepe d’r achter en môsde de iezere drekseimer aan de waage hange en met enne hendel umkiepe. Elk hoeshaaje haet zonne eimer. Zonne gegalvaniseerde iezere eimer wao Belfeld in geständs stong en dae bes zwoar waas. Ich ken mich veursjtelle asse ut ganse dörp gehad haajs, en al die eimers in de heng hads gehad, desse den de piep laeg hads. Pliessie Hansen (de müts) kump mich taege en maant mich um op de stoep te gaon laope. Den in ens, paaf, paaf,.!! Sjakie waas op mich aan ’t sjeete. Sjaakie, dae woënde beej de femilie Warmerdam op de sjoelsjtraot en haet ut syndroom van Down. Sjakie sjting d’r altied netjes en verzorgd op (respect veur de femilie Warmerdam) en waas in gans Belvend gekend. Hae is dök gewaopend met eine bessem um de stoep veur heur hoes en de sjoel sjoen te vaege. Auch is hae kink aan hoës beej de börgemeister. Lups se um in de waeg of euver ziene pasgevaegde stoep, wuurt d’r waal ens “kwaod” of begint op dich te sjeete. Sjakie, idderein kent um en idderein rüp op um. Sjakie is ’n “stökske” Belvend. In det ich op Sjaakie truuk sjeet, geit de bel wir en mot ich renne um op tied op sjael in de rij te sjtaon.

Truuk de klas in wao we beginne met sjrieve. Wat had ich dao de sjurf aan. Ich ben links, en det meug sjienbaar neet. Telkes as ich aansjtalte maak um links te sjrieve, tik Truus mich op de vingers. Oëteindelik ben ich rechs gaon sjrieve, maar heb heejdoor waal ’n sjlech handsjrif. Matje Tieuwe is auch links, maar is det vol blieve haai-je. Sjienbaar is det ein aafwieking asse links bes. Maar ja, Einstein waas auch links.

TherisiaSchool 20230308